تقريبا كلنا عارفين وضع النساء فى مصر. حتى لو اختلفنا على حجم المشكله بس متفقين على وجود المشكله بالفعل. 
الايفنت ده عباره عن ندوه تشجيعيه، مش هنتكلم فيها عن المشاكل اللى كلنا عارفينها وعايشينها، لكن هنتكلم عن ازاى نقدر نقاوم المشاكل دى. الندوه هيقدمها مجموعه من البنات الشابات اللى نجحن فى ظل الظروف دى انهن يحققن نجاحات شخصيه ويتغلبن على معظم المعوقات اللى بتتفرض عليهم كبنات ونساء وكمان قدروا يقدموا المساعده لبنات ونساء تانيين سواء دعم مادى عن طريق خلق فرص عمل تكون مصدر دخل وقوه للسيدات او دعم معنوى عن طريق مناقشه وإثاره بكل جرأه ومثابره المشاكل اليوميه اللى بتواجهها المرأه فى مصر واللى ناس كتير بتعمل نفسها مش واخده بالها منها.

- الهدف من الندوه هو تقديم طاقه وروح ايجابيه، وربما القصص دى تكون مصدر دعم وإلهام لبنات تانيين انهم ما يستسلموش ويدافعو عن طموحهم ووجودهم، وان دايما دايما فى فرص للنجاح ودايما فى حد يساعدك تححقى طموحك.

- الندوه تطوعيه غير قابله للربح، ضمن بحث اكاديمى لرساله ماجستير عن وضع المرأه فى مصر وكيفيه مقاومه هذا الوضع وتغييره للافضل.

- الدعوه عامه لكل البنات والسيدات فقط.
- الندوه لمده ساعتين، فى وقت لطرح اسئله من الحضور، و (coffee Break)

ضيوف الندوه: 

-- أستاذه\ غدير أحمد : مؤسسه ثوره البنات_ Girls Revolution. غدير 24 سنه ، قدرت تخلق لنفسها و لبنات وسيدات كتيره مساحه أمنه لمناقشه مشاكلهم الشخصيه زى الحق فى الجسد والحق فى الاختيار ومحاوله مواجهه المشاكل دى وحلها وكمان قدرت تناقش وتوصل لناس عدد من المشاكل العامه اللى بتواجه معظم النساء.

-استاذه\ نورا جلال: مؤسسه مشروع ( رافيه_ Rafya)، نورا هتكلمنا ازاى قدرت تحقق حلمها ان تكون مصممه ازياء وكمان تقدم فرصه ودعم اقتصادى لنساء منطقه الكُنيسه عن طريق اعطائهم فرصه للعمل بالمشروع ومصدر دخل عن طريق اعطائهم نسبه من المنتجات اللى بينتجوها.

-أستاذه \ نهال سعد زغلول: مؤسسه حركه بصمه واللى حاليا بيخلصو اجراءات تسجيل الحركه كمؤسسه. ،نهال مع باقى اعضاء حركه بصمه قرروا يحولوا الاماكن العامه فى القاهره وبعض المحافظات لأماكن أمنه للنساء من التحرش (الفردى او الجماعى). حركه بصمه بتنظم دوريات فى كل الاعياد ومعظم الجامعات والميادين عشان تحمى البنات من المتحرشين وكمان يساعدو البنت انها تاخد حقها من المتحرش بتسليمه للشرطه أذا ارادت.

الندوه هيكون فيها ضيوف تانيين، ولكن تابعو الايفنت عشان تعرفوا تفاصيل اكتر