قصص وتجارب من ميادين التحرير
الحكاية
خلال الـ ١٨ يوم كنا بنحكى حكايات طول ما إحنا قاعدين مع بعض فى الميدان. واحد يحكى عن الطوب اللى رماه على الضابط يوم ٢٨ يناير، وواحد تانى يحكى عن الرصاصة اللى دخلت فى كتفه … وبعد الـ ١٨ يوم كنت تركب مع تاكسى فيحكى لك حكايته يوم ٢٥ يناير، تنزل خروجة مع أصحابك تلاقى قصص بـ تتحكى يمكن للمرة العشرين! كنا بنحب نسمع القصص لأنها كانت بتفكرنا، وبتدينا شحنة قوة وأمل.
وبعد أسبوع من تنحى مبارك، وبالتحديد يوم ١٧ فبراير، بدأنا نسأل "مين يحب يحكى حكايته فى الثورة؟"
وهكذا بدأ مشروع حكاوى التحرير؛ عرض لقصص وحكايات من ثورة ٢٥ يناير وميادين التحرير. محاولة لتوثيق والتعبير عن تجارب لأشخاص عاديين لن يكتبها التاريخ أو تنشرها الجرائد أو تذيعها قنوات التلفزيون … أول عرض كان فى مايو ٢٠١١ … أكتر من ٢٥ ليلة عرض فى القاهرة، واسكندرية، والمنيا …. وعرض فى جينيفا فى مارس ٢٠١٢.. والعودة إلى القاهرة فى عرضين شهر أغسطس و نوفمبر ٢٠١٢…
وبعد سنتين، قامت مجموعة قبيلة بانتاج نسخة مصورة من العرض وأخرجها أحمد عبد الله (مخرج فيلمى ميكروفون وهيليوبيليس). حكاوى ميادين التحرير خلال الـ ١٨ يوم، ليتم عرضه فى أماكن مختلفة وتحميله على يوتيوب متاح للمشاهدة، ووثيقة للزمن تؤرخ الثورة من خلال مجموعة من التجارب الشخصية.
بدأ المشروع فى جمع وتوثيق وعرض حكايات جديدة بعد الـ ١٨ يوم ... وسيبدأ المشروع فى جمع وعرض تجارب أخرى لمظاهرات واعتصامات فى أماكن أخرى بهدف توثيق الثورة والمقاومة بمفهومها الأوسع ...
كنا نحكى لنحتفل، اليوم نحكى لنقاوم.
العرض المـُصوَّر
(من إنتاج قبيلة)
(الدخول مجانى- الحجز بأسبقية الحضور)
